AMEA Nizami Gəncəvi adına Milli Azərbaycan Ədəbiyyatı Muzeyi tərəfindən Türk Dil Qurumunun həqiqi üzvü, Azərbaycan və Özbəkistan respublikalarının Əməkdar elm xadimi, görkəmli ədəbiyyatşünas alim, akademik Həmid Araslıya həsr olunmuş “Elm aləmində dünya hadisəsi” kitabı çapdan çıxıb.

Yeni nəşr muzeydə akademik Həmid Araslının 105 illiyinə həsr edilmiş elmi sessiyanın materialları əsasında hazırlanıb.

Kitabda görkəmli alimin şərəfli həyat yolundan, elmi fəaliyyətindən, Azərbaycan ədəbiyyatı tarixinin formalaşması və inkişafındakı misilsiz xidmətlərindən bəhs olunur. Nəşrdə, həmçinin H.Arslının Milli Azərbaycan Ədəbiyyatı Muzeyinin yaranmasında göstərdiyi xidmətlər öz əksini tapıb.

Qeyd edək ki, H.Araslı 1940-cı ildən elmi-təşkilati fəaliyyətini bu muzeylə bağlamış, elmi katib, elmi işlər üzrə direktor müavini, 1960-1968-ci illərdə isə direktor vəzifələrində çalışmışdır.

Kitabda vaxtilə H.Araslı ilə bir yerdə çalışmış muzey əməkdaşlarının ədəbiyyatşünas alimlə bağlı xatirələri də yer alıb.

Kitabın redaktoru Fatma Əliyeva, tərtibçisi isə Vüsalə Məmmədovadır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.