AMEA-nın Nizami Gəncəvi adına Milli Azərbaycan Ədəbiyyatı Muzeyinin Aran Regional Şöbəsində müasir Azərbaycan poeziyasının görkəmli nümayəndələrindən biri - şair Musa Yaqubun 80 illik yubileyinə həsr olunan tədbir keçirilib.

Kürdəmir rayon Atakişili kənd orta məktəbində baş tutan tədbirdə muzeyin Aran regional şöbəsinin müdiri, filologiya üzrə fəlsəfə doktoru Yaqut Bahadurqızı çıxış edərək Musa Yaqubun xalqına, Vətəninə olan sevgisindən, şairin yaradıcılığındakı təbiətlə insan arasındakı qarşılıqlı ünsiyyətin qabarıq ifadəsindən danışıb. Bildirib ki, Musa Yaqub şeiri sadəliyi, təmizliyi, büllurtək saflığı ilə dilimizin möcüzəsi, nadir hadisəsidir. 

Tədbirdə Kürdəmir Rayon Mərkəzi Kitabxanasının baş kitabxanaçısı Ərəstun Sadıqov, şair Abduləziz Xanəhmədoğlu və məktəblilərin ifasında ədibin şeirləri səsləndirilib.

Yubiley mərasimində, həmçinin Əməkdar artist, xanəndə Elnarə Abdullayeva, Əməkdar mədəniyyət işçisi, aşıq Əhliman Şirvanlı, III Muğam müsabiqəsinin laureatı Nigar Şabanova, aşıq Elman İsmayıllı, müğənni Arzu Qarabağlı, Milli Konservatoriyanın müəllimi, tarzən Mehman Mikayılovun ifasında mahnılar, muğam, xalq nümunələri səsləndirilib.  

Sonda Musa Yaqub tədbirin təşkilatçılarına və iştirakçılarına minnətdarlığını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.