İyunun 8-də Beynəlxalq Mətbuat Mərkəzində Azərbaycan Xalq Cümhuriyyətinin 100 illik yubileyi ərəfəsində nəşr olunan “Azərbaycan” qəzetində parlament hesabatları və şərhlər” kitabının təqdimat mərasimi keçirilib.

Tədbirdə çıxış edən Azərbaycan Mətbuat Şurasının sədri, Milli Məclisin deputatı Əflatun Amaşov Prezident İlham Əliyevin “Azərbaycan Xalq Cümhuriyyətinin 100 illik yubileyi haqqında” 2017-ci il 16 may tarixli Sərəncamının önəmindən danışıb.

Azərbaycan Xalq Cümhuriyyətinin tariximizdəki müstəsna rolunu vurğulayan Ə.Amaşov “Azərbaycan” qəzetində parlament hesabatları və şərhlər” kitabının əhəmiyyətini diqqətə çatdırıb. Qeyd edib ki, kitab müsəlman Şərqində ilk parlamentli respublika olan Azərbaycan Xalq Cümhuriyyətinin ilk parlamanı - Məclisi-Məbusanının fəaliyyətinə dair “Azərbaycan” qəzetində dərc olunmuş hesabatlar və şərhlərdən bəhs edir.

Ə.Amaşov bildirib ki, “Azərbaycan” qəzeti 23 ay fəaliyyət göstərmiş Azərbaycan Xalq Cümhuriyyətinin salnaməsi olub. Qəzetdə parlament həyatına aid dəyərli hesabatlar və şərhlər var. Nəşr tariximizin bu mötəbər mənbəyini öyrənmək istəyən hər bir oxucu üçün faydalıdır.

Kitabdakı materialları araşdırıb toplayan, ərəb əlifbasından latın əlifbasına çevirən, lüğətin tərtibçisi professor Şirməmməd Hüseynov, nəşrin transliterasiya redaktorları professor Şamil Vəliyev və elmi işçi Samir Mirzəyevdir.

Ə.Amaşov professor Şirməmməd Hüseynovun dərin elmi araşdırmalarının nəticəsi olan bu kitabın dəyərli tarixi mənbə olduğunu vurğulayıb.

Sonra Milli Məclisin Mədəniyyət komitəsinin sədri, AMEA-nın Milli Azərbaycan Ədəbiyyatı Muzeyinin direktoru, akademik Rafael Hüseynov Azərbaycan Xalq Cümhuriyyətinin yaranma tarixindən, fəaliyyətindən bəhs edib. 

“Azərbaycan” qəzetində parlament hesabatları və şərhlər” kitabının tariximiz, elmimiz, mədəniyyətimiz üçün dəyərli töhfə olduğunu vurğulayan R.Hüseynov bu böyük salnamənin professor Şirməmməd Hüseynovun əvəzsiz xidmətlərinin bəhrəsi olduğunu diqqətə çatdırıb.

“Azərbaycan” qəzetinin baş redaktoru, Milli Məclisin deputatı Bəxtiyar Sadıqov Azərbaycan Xalq Cümhuriyyəti qurucularının keçdikləri çətin və şərəfli mübarizə yollarından danışıb. O, ictimaiyyətə təqdim olunan yeni nəşrin tariximiz üçün dəyərli mənbə olduğunu bildirib.

Tədbirdə akademik Nizami Cəfərov, tarix elmləri doktoru, professor Solmaz Rüstəmova-Tohidi, “Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu, professor Cahangir Məmmədli və digər çıxış edənlər də Azərbaycan Xalq Cümhuriyyətinin tariximizdəki yeri və rolundan, təqdim olunan kitabın əhəmiyyətindən bəhs ediblər.

Sonda professor Şirməmməd Hüseynov Azərbaycan Xalq Cümhuriyyətinin tariximizin əlamətdar, unudulmaz hadisəsi olduğunu vurğulayıb, tədbir iştirakçılarına təşəkkürünü bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.