İranın Urmiya şəhərində “Azərbaycan və İran ədəbiyyatı” mövzusunda XIV beynəlxalq konfrans keçirilib.

Urmiya Universitetinin və Fars Dili və Ədəbiyyatının Təşviqi Cəmiyyətinin birgə təşkilatçılığı ilə baş tutan tədbirə İran, Türkiyə, Pakistan, Fransa, Rumıniya, Banqladeş, Hindistan, Avstraliya və digər ölkələrdən şərqşünas alimlər qatılıblar.

Beynəlxalq konfransda AMEA Nizami Gəncəvi adına Milli Azərbaycan Ədəbiyyatı Muzeyinin Komparativistika və bədii tərcümə şöbəsinin müdiri, professor Şəfəq Əlibəyli də iştirak edib. Azərbaycanlı alimin “Füzulinin farsca divanı” adlı məruzəsi tədbir iştirakçıları tərəfindən böyük maraqla qarşılanıb.

Konfransda, həmçinin “Xarici ölkələrdə fars dilinin tədrisi”, “Müasir tədris metodikası”, “Yeni dərsliklərin tərtibi”, “Nitq mədəniyyəti” və digər mövzularda məruzələr dinlənilib, dilçilik və ədəbiyyatın müxtəlif sahələrinə dair geniş müzakirələr aparılıb.

Ədəbiyyatın tədqiqinə həsr olunmuş bölmə iclası isə İran və digər ölkə şairlərinin farsdilli əsərləri ilə yanaşı, Xaqani, Nizami, Füzuli yaradıcılığını da təhlil edən məruzələrlə yadda qalıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.