AMEA Nizami Gəncəvi adına Milli Azərbaycan Ədəbiyyatı Muzeyində IX-X əsr Şərq fəlsəfəsi və elmi fikrinin görkəmli nümayəndəsi Əbunəsr Əl Fərabiyə həsr olunan elmi seminar keçirilib.

Tədbirdə muzeyin Qədim və orta əsrlər Azərbaycan ədəbiyyatının tədqiqi və təqdimi şöbəsinin elmi işçisi Natavan Bağırova “Əl Fərabi fəlsəfəsində ilk varlıq anlayışı” mövzusunda məruzə ilə çıxış edib. Böyük türk filosofu Əbunəsr Əl Fərabinin dövrü və zəngin elmi yaradıcılığı barədə məlumat verən məruzəçi onun ömrünün böyük bir hissəsinin Dəməşq şəhərindəki Seyfəddövlə (944-967) sarayı ilə bağlı olduğunu bildirib.

O, Əl Fərabinin ərəb hökmdarı Seyfəddövlənin hakimiyyəti dövründəki elmi fəaliyyətindən, onun fəlsəfə, məntiq, qrammatika, tibb, həndəsə və astronomiyaya dair çoxsaylı əsərlərindən bəhs edib. Məruzəçi Əl Fərabinin “Fəzilətli şəhər əhlinin baxışları” əsərini təhlil edərək, alimin ilk varlıq haqqındakı fəlsəfi mühakimələrini “Quran-i Kərim” ayələrilə müqayisədə izah edib.   

Seminar məşğələsi muzeyin elmi işlər üzrə direktor müavini, filologiya üzrə elmlər doktoru, professor Xatirə Bəşirli, İctimaiyyətlə əlaqələr şöbəsinin müdiri, filologiya üzrə fəlsəfə doktoru Nəzmiyyə Yigitoğlu və Ekspozisiyanın qorunması, izahı və audio-video müşaiyətin təmini şöbəsinin müdiri Tomiris Babanlının sual və çıxışları ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.