Sentyabrın 17-də AMEA-nın Nizami Gəncəvi adına Milli Azərbaycan Ədəbiyyatı Muzeyində “Risalə” elmi araşdırmalar jurnalının növbəti - 18-ci sayının təqdimatı keçirilib.

 

Pandemiya qaydalarına uyğun təşkil olunmuş tədbiri giriş sözü ilə muzeyin direktoru, akademik Rafael Hüseynov açıb. O, bildirib ki, jurnalın yeni nömrəsi məzmun etibarilə klassik və müasir dünya, o cümlədən Azərbaycan ədəbiyyatı, ədəbiyyat nəzəriyyəsi, ədəbi təhlil və tənqid, folklorşünaslıq, mətnşünaslıq sahələrindəki araşdırmaları, həmçinin muzeyşünaslıq elminin problemlərini işıqlandıran məqalələri əhatə edib.

 

Diqqətə çatdırılıb ki, yeni say “Klassik irs: tarixi və nəzəri problemləri”, “Yeni və müasir dövrdə ədəbi-mədəni proses”, “Tarixi və mədəni abidələrin qorunması və tədqiqi”, "Muzeyşünaslıq” bölmələrindən ibarətdir.

 

Akademik R.Hüseynov qeyd edib ki, ədəbiyyatın müxtəlif mövzu və məsələlərinə dair tədqiqatların yer aldığı jurnalda muzey əməkdaşlarının, gənc alim və tədqiqatçıların əsərləri elmi ictimaiyyətə təqdim olunur. Jurnalda işıq üzü görən məqalələrin müəllifləri arasında elmlər doktorları, fəlsəfə doktorları, dissertasiya müdafiəsinə hazırlaşan gənc tədqiqatçılar var.

 

Tədbirdə iştirak edən məqalə müəlliflərinə “Risalə” elmi araşdırmalar jurnalının yeni nömrəsi paylanılıb.

 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.