Dekabrın 2-də Türkiyənin Konya şəhərindəki Səlcuq Universiteti və Aydın Adnan Menderes Universitetinin təşkilatçılığı ilə Bilgə Tonyukuk ilinə həsr olunmuş “Türk mədəniyyəti, sənəti və mədəni irsi qoruma” adlı beynəlxalq simpozium öz işinə başlayıb. İki gün davam edən tədbirin Azərbaycandan olan iştirakçıları sırasında AMEA Nizami Gəncəvi adına Milli Azərbaycan Ədəbiyyatı Muzeyinin alimləri də yer alıb.  

COVID-19 pandemiyası ilə əlaqədar olaraq onlayn şəkildə təşkil edilən konfransın açılış mərasimi türkiyəli professorlar Əhməd Aytac, Osman Kunduracı, Osman Səlcuq Aydəmir və digər xarici ölkə alimlərin çıxış və elmi məruzələri ilə yadda qalıb. İştirakçılar XIV Beynəlxalq Simpozium çərçivəsində, həmçinin türk təsəvvüf tarixi və incəsənətini nümayiş etdirən virtual sərgi ilə tanış olublar.

Konfransda Nizami muzeyinin əməkdaşları - filologiya üzrə fəlsəfə doktorları Sevinc Heydərova və Nəzmiyyə Yigitoğlu, kulturologiya üzrə fəlsəfə doktoru Nailə Əliyeva, fəlsəfə üzrə fəlsəfə doktoru Kəmalə Nuriyeva və muzeyin doktorantı Gülnar Əqiqin türk və ingilis dillərində “Azərbaycan milli mətbuatının və Nizami muzeyinin təqdimatı”, “Azərbaycan torpaqlarının istilası tarixi milli ədəbiyyatda”, “Nizami muzeyinin ekspozisiyasnda Şirvanşahlar dövrü mədəniyyətinin əksi”, “Abbasqulu Ağa Bakıxanovun “Riyazü-l-qüds əsəri klassik məqtəl nümunəsi kimi”, “Qacarlar dövrü ədəbiyyatında İran-Rusiya savaşının inikası” adlı məruzələri dinlənilib.

Muzey əməkdaşlarının Azərbaycan ədəbiyyatı, publisistikası, muzeyşünaslıq, eləcə də dünya ədəbiyyatı mövzularına həsr olunmuş çıxışları tədbir iştirakçıları tərəfindən böyük maraqla qarşılanıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.