Muzey əməkdaşı Moskvada keçirilmiş videokonfransda iştirak edib + Foto Fev 22, 2021 | 09:53 / Konfranslar, İclaslar

Azərbaycanın Rusiya Federasiyasındakı səfirliyi və AMEA-nın Nizami Gəncəvi adına Milli Azərbaycan Ədəbiyyatı Muzeyinin dəstəyi ilə Moskva şəhərinin K.A.Kərimov adına 1583 saylı ümumtəhsil məktəbində “Sözün gücü” adlı videokonfrans keçirilib.

Tədbirin əsas mövzusu bu il ölkəmizdə 880-ci ildönümü qeyd olunan dahi Azərbaycan şairi və mütəfəkkiri Nizami Gəncəvinin dövrü və yaradıcılığı olub.

Onlayn konfransda Heydər Əliyev Fondunun Rusiya Federasiyasındakı nümayəndəliyi, Moskva Dövlət Pedoqoji Universiteti, Rusiya Maarif Nazirliyi və digər təşkilatların əməkdaşları iştirak ediblər. 

Videokonfransı giriş sözü ilə açan 1583 saylı Moskva ümumtəhsil məktəbinin direktoru Svetlana Yevqenyevna Dvoryantseva Azərbaycanın və Şərqin dahi şairi Nizami Gəncəvinin yaradıcılığına həsr edilmiş tədbirin əhəmiyyətini qeyd edib. Bildirib ki, böyük mütəfəkkirin zəngin ədəbi irsi sülh və tolerantlığın nümunəsidir. 1991-ci ildə UNESCO tərəfindən “Nizami ilinin” elan olunmasını xatırladan məktəb direktoru 2021-ci ilin Azərbaycanda “Nizami Gəncəvi İli” elan olunmasını tarixi hadisə kimi dəyərləndirib. 

“Nizami Gəncəvi tarixdə və bu gün” mövzusunda müxtəlif çıxışların səsləndiyi videokonfransda Nizami muzeyinin Ədəbi mərasimlər və nəşrlər şöbəsinin böyük laborantı, izahatçı Zarema İbrahimova da iştirak edib. O, tədbirdə muzeyin böyük sənətkara həsr olunmuş ekspozisiya zalları barədə ətraflı izahat verib. Zarema İbrahimovanın çıxışı muzeyin Nizami zalında sərgilənən nəfis xalıların, heykəllərin, miniatür və tabloların videogörüntüləri ilə müşaiyət olunub. 

Nizami Gəncəvinin 880 illik yubileyinə həsr olunmuş “Sözün gücü” adlı videokonfrans Moskva məktəblilərinin ifasında Nizami lirikasına məxsus qəzəllərin, “Sevgili canan” romansının ifası ilə davam edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.

Video
Faydalı linklər
Facebook