AMEA Nizami Gəncəvi adına Milli Azərbaycan Ədəbiyyatı Muzeyinin əməkdaşları aprelin 16-da Lənkəran şəhəri Gənclər və İdman İdarəsinin təşkilatçılığı ilə keçirilən videokonfransda iştirak ediblər.

Böyük Azərbaycan şairi və filosofu Nizami Gəncəvinin 880 illik yubileyinə həsr olunmuş tədbirdə Lənkəran şəhər gəncləri və məktəbliləri ilə yanaşı, Gəncə Dövlət Tarix Mədəniyyət Qoruğu Nizami filialının müdiri Gülnarə İsmayılova, Türkiyənin Səlcuq Universitetinin professoru Ali Temizel və digərləri iştirak ediblər.

Konfrans iştirakçıları sırasında Nizami muzeyinin əməkdaşları – Mətbuat və informasiya şöbəsinin müdiri, filologiya üzrə fəlsəfə doktoru Nəzmiyyə Yigitoğlu və Qadınlar Təşkilatının sədri, filologiya üzrə fəlsəfə doktoru Sevinc Heydərova da yer alıblar.

Nəzmiyyə Yigitoğlu tədbirdə muzeyin Nizami Gəncəvi irsini yaşadan ekspozisiya zalları barədə məlumat verib. Daha sonra videoçarx vasitəsilə Nizami muzeyinin zallarına virtual səyahət keçirilib.  

Sevinc Heydərova isə çıxışında Nizami Gəncəvi yaradıcılığında qadına münasibətin səciyyəvi xüsusiyyətlərindən danışıb. O, şairin “Xəmsə”sini bəzəyən bir-birindən maraqlı qadın qəhrəmanlardan söz açaraq, onları ideya-məzmun baxımından təhlil edib.

Daha sonra videokonfransın fəxri qonaqlarından olan Türkiyə Səlcuq Universitetinin professoru Ali Temizel çıxış edərək Nizami Gəncəvi məsnəvilərinin Türkiyə miqyasındakı tərcümə və nəşr tarixindən bəhs edib.

Sonda tədbir iştirakçıları videoçarx vasitəsilə Gəncə şəhərində yerləşən Nizami Mərkəzi və Nizami məqbərəsindən görüntüləri izləyiblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.