Tanzaniya Birləşmiş Respublikasının Vitse-prezidenti Filip İsdor Mpanqo xanımı ilə birlikdə BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasında (COP29) iştirak etmək üçün Azərbaycana gəlib. Bu münasibətlə ölkəmizdə qonaq olan Vitse-prezidentin xanımı Dionisia Monimpaye Mpanqo nümayəndə heyəti ilə birlikdə Nizami Gəncəvi adına Milli Azərbaycan Ədəbiyyatı Muzeyini ziyarət edib. Azərbaycanın keçmişi və bu günü ilə, çoxəsrlik tarixi, ədəbiyyatı, mədəniyyəti ilə yaxından maraqlanan  Xanım Dionisia Mpanqonun ölkəmizə ikinci gəlişidir.

Qonaqları qarşılayan Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynov Xanım Dionisia Mpanqo ilə səmimi söhbət edib. Rafael Hüseynov Nizami muzeyinin tarixi haqqında qısa məlumat verib və qeyd edib ki, burada yalnız Azərbaycanın söz tarixinin deyil, bütöv mədəni keçmişi əks olunub. 

 Ziyarətçiləri ekspozisiya ilə  kulturologiya üzrə fəlsəfə doktoru Nailə Əliyeva tanış edib.

Müxtəlif dövrlərdə siyasi repressiyalara məruz qalmış, Azərbaycan ədəbiyyat və mədəniyyət xadimlərinə həsr edilmiş ekspozisiya  qonaqların marağına səbəb olub. Xanım Dionisia Mpanqo  onun da ölkəsinin tarixində belə həyəcanlı səhifələrin olduğundan söz açıb. Bildirib ki, milli tarixin həssas parçası ilə bağlı muzeydə insanları duyğulandıran  və düşündürən, bir növ əyani tarix dərsliyi rolunu oynayan belə geniş və təsirli ekspozisiyanın varlığı vacibdir.

Xanım Dionisia Mpanqo  muzeyin “Rəy kitabı”nda  təəssüratlarını bölüşərək qısa bir zaman ərzində Azərbaycan xalqının minillərə sığan böyük mədəniyyəti və ədəbiyyatı haqqında aldığı müfəssəl bilgilərdən çox duyğulandığını, bu muzeyin xalqı tanıyıb sevmək üçün ən münasib və doğru məkan olduğunu qeyd edib.

Sonda xanım Dionisia Mpanqo qonaqpərvərliyə, ölkənin ədəbiyyat və mədəniyyət tarixini qoruyub saxladığına görə muzeyin direktoru, akademik Rafael Hüseynova  təşəkkürünü bildirib. Rafael Hüseynov muzeydən xatirə olaraq Nizami Gəncəvi adına Milli Azərbaycan Ədəbiyyatı Muzeyinin ingilis dilində nəşrlərini –  müəllifi olduğu “Şirvan şairləri” kitabını və  “Nizami muzeyinin xalçaları” bukletini qonaqlara hədiyyə edib. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.