Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində Azərbaycana gəlmiş mətbuat nümayəndələrinin bir çoxu ölkəmizin tarixi, ədəbiyyatı və mədəni irsinə maraq göstərir, COP29 tədbirlərini işıqlandırmaqla yanaşı, bu mövzulara da diqqət ayırırlar.  

Ölkəmizdə olan Şri-Lankalı yazıçı-jurnalist Purnima Verasekara da bu məqsədlə Nizami Gəncəvi adına Milli Azərbaycan Ədəbiyyatı Muzeyini ziyarət edib. O, ABŞ-ın nüfuzlu Stenford Universitetinin məzunu olub. Purnima Verasekara iri miqyaslı mühüm tədbirlərdə məlumatların yayımlanmasında beynəlxalq təcrübəsi olan, COP29 media nümayəndələri üçün nəzərdə tutulmuş akkreditasiyadan keçmiş təcrübəli media nümayəndəsidir. 

Nizami Muzeyində qonaq olan yazıçı-jurnalist Purnima Verasekara muzeyin elmi işçisi Aymən Həsənovanın təqdimatında Azərbaycanın görkəmli şair və yazıçılarının zəngin irsini əks etdirən ekspozisiya ilə tanış olub. Azərbaycan ədəbiyyatı sərgilənən ekspozisiyada əsas məqamlarla yanaşı burada mədəniyyətin, incəsənətin müxtəlif sahələri, əsasən xalq yaradıcılığı nümunələri jurnalistin diqqətini xüsusi cəlb edib. Purnima Verasekara keçmişini gələcəyə ötürmək missiyasını daşıyan Nizami Muzeyi ilə yaxından tanışlıqdan və ətraflı təqdimatdan məmnun qalıb. 

  Sonda xoş təəssüratlarını muzeyin “Rəylər və təəssüratlar kitabı”nda bölüşən Purnima Verasekara Nizami muzeyinin ekspozisiyasında sərgilənən klassik və müasir Azərbaycan ədəbiyyatının görkəmli şairləri haqqında məlumatların önəmli olduğunu bildirib. Qeyd edib ki, xüsusən Nizami Gəncəvinin və Əfzələddin Xaqani Şirvaninin yaradıcılığı onu daha çox maraqlandırıb. Jurnalist Nizami Muzeyinə heyranlığını və bu ziyarətdən böyük zövq aldığını vurğulayıb. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.