Pakistanın Bəlucistan Universitetinin professoru Ali Kumail Qızılbaş Nizami Gəncəvi adına Milli Azərbaycan Ədəbiyyatı Muzeyini ziyarət edib.

Qeyd edək ki, o, Xəzər Universiteti Mövlana Ədəbi Fəlsəfi Araşdırmalar İnstitutu və Şimali Kipr Türk Cümhuriyyəti Yaxın Şərq Universiteti Rumi Araşdırmalar Mərkəzinin birgə təşkilatçılığı ilə Bakıda keçirilən IX Rumi Beynəlxalq Elmi Simpoziumunda iştirak etmək üçün ölkəmizdə səfərdədir.

Qonağı Ədəbiyyat Muzeyinin direktoru akademik Rafael Hüseynov qarşılayıb. O, Azərbaycan ilə Pakistan arasındakı dostluq əlaqələrindən danışıb, iki ölkənin mədəniyyət sahəsində birgə mühüm layihələr həyata keçirmək üçün geniş imkanlara malik olduğunu vurğulayıb.

Söhbət əsnasında akademik Rafael Hüseynov Şərqin müdrik filosof-şairi Mövlana Cəlaləddin Ruminin öz əsərləri ilə Azərbaycan fəlsəfi fikir tarixinə əhəmiyyətli təsir göstərdiyini də vurğulayıb.

Muzeyin direktoru müəllifi olduğu “Nizami Muzeyinin xalçaları” açıqca dəstini (ingils dilində) və  “Məhsəti Gəncəvi. Portret-oçerk” (fars dilində) kitabını professor Ali Kumail Qızılbaşa hədiyyə edib.

Pakistanlı qonaq səmimi görüşə görə akademik Rafael Hüseynova minnətdarlığını bildirib.

Sonra muzeyin əməkdaşı filologiya üzrə fəlsəfə doktoru Gülnar Əqiq professor Ali Kumail Qızılbaşı muzeyin ekspozisiyası ilə tanış edərək Azərbaycan klassik ədəbiyyatının görkəmli nümayəndələri haqqında ona ətraflı məlumat verib. Pakistanlı alim qüdrətli Azərbaycan şairlərinin, xüsusilə İmadəddin Nəsiminin yaradıcılığına böyük maraq göstərib.

O, Azərbaycan xalqının istedadlı nümayəndələrinin yaratdığı ecazkar sənət əsərlərinə heyran qaldığını, əcdadları qızılbaş türklərinin vətəninin belə qədim və zəngin mədəniyyətə sahib olduqları üçün qürur və ifixar duyduğunu bildirib, bununla bağlı fikirlərini muzeyin rəylər və təəssüratlar kitabında bölüşüb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.