Nizami Gəncəvi adına Milli Azərbaycan Ədəbiyyat Muzeyi 2026-cı il üçün hazırladığı Mülki Müdafiə tədbirləri planına əsasən, Muzeydə 1 Mart – Ümumdünya Mülki Müdafiə Günü münasibətilə 27 fevral 2026-cı ildə xüsusi maarifləndirici tədbir təşkil etmişdir.

Tədbir muzeyin akt zalında keçirilib. Muzeyin Mülki Müdafiə Qərargahının rəisi İsmayıl Muxtarov giriş nitqi ilə çıxış edərək, Beynəlxalq Mülki Müdafiə Təşkilatının 1972-ci ildə yaradılmasından bəri bu günün bütün dünyada qeyd olunduğunu, Azərbaycanın 1993-cü ildən bu təşkilata üzv olduğunu və mülki müdafiənin günümüzdəki əvəzedilməz rolunu ətraflı şəkildə izah etmişdir

Ardınca Təchizat və Xidmət şöbəsinin müdiri Y. Zeynalov “Dayanıqlı və sabit gələcək naminə ekoloji risklərin idarə edilməsi” mövzusunda məruzə ilə çıxış edib. O, çıxışında dayanıqlı gələcək üçün ekoloji və texnogen təhlükələrin idarə olunmasının, fövqəladə hallara hazırlığın və bu zaman atılacaq addımların vacibliyini vurğuladı. Məruzədə həmçinin, insan həyatının qorunması və resursların səmərəli istifadəsi üçün praktiki məsləhətlər yer aldı.

Tədbirdə iştirakçılara fövqəladə hallarda xilasetmə əməliyyatları, yanğınsöndürmə üsulları və ilk tibbi yardımın göstərilməsi praktiki olaraq nümayiş etdirildi. Muzeyin mülki müdafiə avadanlıqları, plakatlar və tematik ədəbiyyatlar sərgiləndi.

Sonda iştirakçılara mövzu ilə bağlı xüsusi hazırlanmış videoçarx nümayiş etdirilib. Tədbir boyu çəkilən fotoşəkillər də bu günün əhəmiyyətini əks etdirən dəyərli material kimi qeydə alındı.

Ümumilikdə, 1 Mart Ümumdünya Mülki Müdafiə Günü ilə əlaqədar keçirilən tədbir planlı, yüksək səviyyədə təşkil olunmuş və muzey kollektivinin fövqəladə hallara hazırlığı və maariflənməsi baxımından çox faydalı olmuşdur. Bu cür tədbirlər əməkdaşların məsuliyyətini artıraraq, potensial risklərə qarşı daha ayıq-sayıq olmalarına kömək edir.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.