Nizami Gəncəvi adına Milli Azərbaycan Ədəbiyyatı Muzeyi 3 oktyabr, 2016-cı ildə növbəti fəxri qonaqlarını qəbul etdi.

Beynəlxalq Humanitar Forumunda və Roma Papası Fransiskin Bakıya səfəri ilə bağlı tədbirlərdə iştirak etmək üçün Azərbaycana gəlmiş Fransa Milli Assambleyasının deputatı, Fransada Azərbaycanın Dostları Assosiasiyasının prezidenti Jan Fransua Manselin başçılığı ilə bir qrup parlamentari Nizami muzeyini ziyarət etdi.
Muzeyə qonaq gəlmiş heyətə Jan Fransual Manseldən başqa Fransa Milli Assambleyasının deputatı, Fransa Milli Assambleyasında Azərbaycan-Fransa Dostluq Qrupunun vitse-prezidenti, Milli Assambleyada beynəlxalq məsələlər kommisiyasının üzvü Fransua Seliye, Fransa Milli Assambleyasının deputatı, Milli Assambleyada beynəlxalq məsələlər kommisiyasının üzvü və katibi, Respublikaçılar partiyasının üzvü Mişel Tero, Fransa Milli Assambleyasının deputatı, Milli Assambleyada iqtisadi məsələlər kommisiyasının üzvü, Houdan komunnasının Meri, Respublikaçılar partiyasının üzvü Jan-Mari Tetar, Fransanın tanınmış heykəltəraşı və rəssamı, YUNESKO-nun sülh sənətkarı xanım Hedva Ser daxil idilər.
Muzeyin binasını unikal memarlıq abidəsi adlandıran qonaqlar ekspozisiyasını gəzməkdən də böyük zövq aldılar. Qonaqlara zəngin Azərbaycan ədəbiyyatının keçdiyi şərəfli yol, bu ədəbiyyatı yaradan dahilər – Qətran Təbrizi, Məhsəti Gəncəvi, Xaqani Şirvani, Nizami Gəncəvi, İmadəddin Nəsimi, Şah İsmayıl Xətayi, Məhəmməd Füzuli və başqaları haqqında ətraflı məlumat verildi.
Azərbaycan ədəbiyyatının bütün dövrlərində yazıb-yaradan sənətkarların əsərlərində əksini tapan multikultural, tolerant dəyərlər, ustadlarımızın ayrı-ayrı dinlərə, dillərə mənsub xalqlara dost münasibəti qonaqların böyük marağına səbəb oldu.
Muzeyin ekspozisiyasında nümayiş etdirilən xalçalar, miniatürlər, orta əsrlərə aid kaşılar və xatirə əşyaları Fransalı qonaqları heyran etdi və onlar muzeyin zövqlə yaradılmasını da xüsusi qeyd etdilər.
Fransa Milli Assambleyasının deputatı, Fransada Azərbaycanın Dostları Assosiasiyasının prezidenti Jan Fransua Mansel Muzeyin “Xatirə” kitabına ürək sözlərini yazdı.
Qonaqlara XII əsrin görkəmli şairəsi Məhsəti Gəncəvinin 900 illik yubileyi münasibətilə akademik Rafael Hüseynovun fransız dilində nəşr edilmiş “Məhsəti Gəncəvi” monoqrafiyası hədiyyə edildi.
Daha bir sevindirici xəbər ondan ibarətdir ki, oktyabrın 7-də Heydər Əliyev Fondunun dəstəyilə Fransanın Konyak şəhərində Məhsəti Gəncəvinin heykəli ucaldılmışdır və bu şairənin ölkə xaricindəki ilk abidəsidir.
Bu hadisə iki ölkə arasında dostluq və əməkdaşlığın daha da möhkəmlənməsinin, Azərbaycan və Fransa arasında mədəni əlaqələrin güclənməsinin bariz sübutudur.