Noyabrın 1-də Azərbaycan Rəssamlar İttifaqının üzvü, Əməkdar rəssam, Azərbaycan Dövlət Pedaqoji Universitetinin təsviri sənət kafedrasının dosenti Rais Rəsulzadənin 70 illik yubileyi münasibətilə tədbir keçirilib.

Tədbirdə millət vəkilləri, mədəniyyət və incəsənət xadimləri, KİV nümayəndələri iştirak ediblər.

Mərasimdə araşdırmaçı alim Nəsiman Yaqublu Rəis Rəsulzadənin həyat və yaradıcılığı barədə geniş məlumat verib. Bildirib ki, R.Rəsulzadə Azərbaycan rəssamlıq sənətinə böyük töhfələr vermiş şəxsiyyətdir. O, 500-dən artıq sənət əsərlərinin müəllifidir.

N.Yaqublu bildirib ki, 80-ci illərdən başlayaraq əsərləri dünyanın bir çox ölkələrində nümayiş etdirilən R.Rəsulzadə Azərbaycan Dövlət Pedaqoji Universitetində müəllim kimi də fəaliyyət göstərir.

Sonra çıxış edən AMEA-nın Milli Azərbaycan Ədəbiyyatı Muzeyinin direktoru, akademik Rafael Hüseynov Əməkdar rəssamın sənət aləmində qazandığı uğurlardan söhbət açıb. Bildirilib ki, R.Rəsulzadə Azərbaycanın ən şanslı soyadlarından birini daşıyır və ən şərəfli nəslin övladlarından biridir. O, sehrli fırçanın gücü, rənglərin harmoniyası ilə nadir incilər, bənzərsiz sənət nümunələri yaradaraq ömür yolunu xalqımızın mədəniyyətinin, qədim adət-ənənələrinin qorunub saxlanmasına və inkişaf etdirilərək gələcək nəslə çatdırılmasına həsr edib. Onun əsərləri arasında təbiət rəsmləri çoxluq təşkil edir.

Akademik R.Hüseynov qeyd edib ki, ölkəmizin mədəni həyatında səmərəli fəaliyyəti, əsərlərində bədii milli ruhun qabarıq ifadə olunması R.Rəsulzadənin bu sənətə qəlbən bağlılığını göstərir.

Xalqımızın milli təsviri sənət nümunələrinin yaşadılmasında, Azərbaycan rəngkarlığında əvəzsiz xidmətləri dövlət tərəfindən yüksək qiymətləndirilərək 2002-ci ildə Rais Rəsulzadəyə Azərbaycan Respublikasının Əməkdar rəssamı fəxri adı verilib.

Mərasimdə millət vəkilləri Vahid Əhmədov, Fazil Mustafa və digər çıxış edənlər tanınmış rəssamın yaradıcılığının bədii məziyyətlərindən söhbət açıblar.

Tədbirdə çıxış edən Rais Rəsulzadə göstərilən diqqət və qayğıya görə minnətdarlığını bildirib.

Tədbirin sonunda rəssamın əsərlərindən ibarət sərgiyə baxış olub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.